कोरोनाका कारण रिलिज मिति पछि सरेको चलचित्र ‘ए मेरो हजुर–४’ ले पुनः रिलिज मिति लिएको छ । यसअघि गत भदौ ४ गतेलाई रिलिज मिति लिएको यो चलचित्र अब आगामी चैत्र २५ गते रिलिज हुने भएको छ ।

अभिनेता अनमोल केसी र सुहाना थापाले शीर्ष भूमिकामा रहेर अभिनय गरेको यो चलचित्र सुनिलकुमार थापाले निर्माण गरेका हुन् । झरना थापाले निर्देशन गरेको यो चलचित्र ‘ए मेरो हजुर’ को सिरिज चलचित्र हो ।

कोरोनाका कारण लामो समयदेखि बन्द रहेका हल खोल्न सरकारले अनुमति दिएको छ । सरकारी अनुमति पाएर पनि धेरै निर्माता निर्देशक भने आफ्ना चलचित्र रिलिज गर्न डराइरहेका छन् । 

निर्माता निर्देशकले चलचित्र प्रदर्शनमा चासो नदिदा अनुमति पाएको एक साता बित्दा पनि सिनेमा हल खुल्न सकेका छैनन् ।