यातायात व्यवस्था विभागले यही साताको अन्तिमबाट सवारी लाइसेन्सको नयाँ आवदेन खुलाउने तयारी गरेको छ । विभागले ६ महिनापछि सवारीचालक अनुमतिपत्र (लाइसेन्स) को नयाँ आवेदन खुलाउने तयारी गरेको हो ।  

यातायात व्यवस्था विभागका महानिर्देशक नमराज घिमिरेले कोटा सिस्टम लागू गरेर आउँदो शुक्रबारदेखि नयाँ आवेदन खुलाउने तयारी भएको जानकारी दिएका छन् । 

नयाँ आवेदन खुलाए पनि तत्काल नयाँ आवेदकको परीक्षा भने नहुने विभागका प्रवक्ता डा. लोकनाथ भुसालको भनाइ छ । दैनिक कति आवेदकले आवेदन दिन पाउने भनी कोटा सिस्टम लागू गरेर आवेदन खुलाइने उनले जानकारी दिए ।

देशभरबाट एक दिनमा पाँच हजार जनाले आवेदन दिन पाउने विभागले जनाएको छ । देशभरका २१ ओटा यातायात कार्यालयबाट दैनिक पाँच हजार जनाले आवेदन भर्न पाउनेछन् । 
 
अझै चार लाख पुराना आवेदकको परीक्षा बाँकी रहेको विभागले जनाएको छ ।