लामो समय देखि नेपालमा अमरिकी सहयोग मिलेनियम च्यालेन्ज कर्पोरेसन (एमसिसी) सम्झौता कार्यान्वयनको चरणमा जाओस् भन्ने चाहना राखेको अमेरिकाले फेरि यो कुरा दोहोर्याएको छ । 

अमेरिकी सहायक विदेशमन्त्री डोनाल्ड लुले एमसिसी नेपालको हितमा भएकाले संसदबाट चाँडै पारित हुने विश्वासमा आफूहरु रहेको बताएका हुन् । 

नेपालको तीन दिने भ्रमणमा रहेका लुले बिहीबार प्रधानमन्त्री देउवासँग शिष्टाचार भेटघाटमा एमसिसीको विषयमा अमेरिकी धारणा राखेका हुन् । उनले एमसिसीले नेपालको विकासमा महत्त्वपूर्ण योगदान दिनसक्ने पनि उल्लेख गरेका छन् ।

यसबारे भेटमा प्रधानमन्त्री देउवाले एमसिसी पारितका लागि अन्य दलको पनि सहमति चाहिने भन्दै छिट्टै निर्णय लिने जवाफ दिएको बालुवाटार स्रोतले बतायो । 

‘एमसिसी पारित होस् भन्ने चाहना लुको थियो,’ बालुवाटार स्रोतले फरकधारसँग भन्यो, ‘प्रधानमन्त्री देउवाले यसका लागि आफूले सक्दो छिटो वातावरण बनाउन पहल गर्ने भन्नु भएको छ ।’ भेटमा प्रधानमन्त्री देउवाले एमसिसीको विषयमा नेपालमा भइरहेको विवादबारे अमेरिका जानकार रहेकोमा आफू विश्वस्त भएको पनि बताएका छन् ।

प्रधानमन्त्री देउवा र अमेरिकी सहायक मन्त्री लुबीच एमसिसीबारे कुराकानी भएको विषयमा घुमाउरो पाराले परराष्ट्र मन्त्रालयले पनि स्वीकार गरेको छ । तर, परराष्ट्रको विज्ञप्तिमा एमसिसीको विषयमा छलफल भएको भन्ने उल्लेख गरिएको छैन । परराष्ट्रले अमेरिका र नेपालबीच विभिन्न साझा सरोकारका विषयमा कुराकानी भएको आफ्नो विज्ञप्तिमा उल्लेख गरेको छ ।

देउवाको नेतृत्वमा सरकार बनेपछि एमसिसीकै विषयलाई लिएर अमेरिकाबाट उच्च अधिकारीले नेपाल भ्रमण गरेको यो दोस्रो पटक हो ।

यसअघि एमसिसी उपाध्यक्ष फातिमा सुमारले नेपाल भ्रमण गर्दै एमसिसी सम्झौतालाई नेपालमा राजनीतिकरण गरिएको भन्दै असन्तुष्टि जनाएकी थिइन् । उनले भ्रमण सकाएर जानुअघि नेपालले एमसिसी छिट्टै पारित गर्नेमा आफू विश्वस्त रहेको बताएकी थिइन् ।