भारतमा नयाँ कोरोना भाइरसको नयाँ भेरियन्ट ओमिक्रोनबाट संक्रमितको हुनेको संख्या दिनहुँ बढिरहेको छ । समाचार एजेन्सी एएनआईका अनुसार २४ घण्टामा त्यहाँ १७ जनामा नयाँ भेरियन्टको संक्रमण पुष्टि भएको छ ।

आइतबार राजस्थानमा नौ, महाराष्ट्रमा सात र दिल्लीमा एकजनामा ओमिक्रोनको संक्रमण पुष्टि भएको हो । योसँगै भारतमा ओमिक्रोनबाट संक्रमितको हुनेको संख्या २१ पुगेको छ ।

भारतमा संक्रमण पुष्टि भएका नयाँ ओमिक्रोन संक्रमित दक्षिण अफ्रिका र नाइजेरियाबाट स्वदेश फर्किएका थिए ।

एजेन्सीका अनुसार महाराष्ट्रमा देखिएका ओमिक्रोन संक्रमितमा एक महिला पनि छिन् । साथै, उनका भाइसहित दुई छोरीलाई पनि संक्रमण पुष्टि भएको छ ।

नोभेम्बरको सुरुमा दक्षिण अफ्रिकामा देखिएको ओमिक्रोन भेरियन्टको संक्रमण अन्य देशमा पनि देखिन थालेको छ । नेपालमा भने हालसम्म यो भेरियन्टको संक्रमण पुष्टि भइसकेको छैन ।