हिन्दूहरूको आस्थाको केन्द्र रहेको मधेस प्रदेशको राजधानी जनकपुरधामको धार्मिक तथा ऐतिहासिक स्थल जानकी मन्दिरसँगै रहेको विवाह मण्डपमा फेरि अश्लिल टिकटक भिडियो बनाउनेहरूकाे जमघट हुन थालेको छ ।
मन्दिरलाई एकातर्फ विश्व सम्पदा सूचीमा सूचीकृत गराउने प्रयास भइरहेको छ भने अर्कोतर्फ मन्दिरको सौन्दर्य मास्ने खेल समेत चलिरहेको छ । मन्दिरको वातावरण अश्लील टिकटक बनाएर बिगार्ने प्रयास हुँदै आइरहेको देखिन्छ ।
धार्मिक स्थलहरूमा अहिले युवाहरूको ठूलो जमात भोजपुरी अश्लील गीतहरूमा टिकटक बनाउने गरेको पाइएको छ । जनकपुरको प्रसिद्ध धार्मिक मन्दिरहरू जानकी मन्दिर, राम मन्दिर, विवाह मण्डपमा समेत भोजपुरी गीतहरूमा टिकटक बनाउने गरिएको पाइएको छ ।
पछिल्लो पटक स्थानीय युवा गणेश साहले धार्मिक स्थलहरूमा टिकटक बनाउने व्यक्तिलाई पक्राउ गर्न स्थानीय प्रशासनसँग माग गरेपछि जानकी मन्दिर, विवाह मण्डप लगायतका ठाउँहरूमा स्थानीय प्रशासनले टिकटक बनाउन रोक लगाएको थियो । तर, केही महिना नबित्दै पुनः त्यहाँ भीड लाग्न सुरु भएको छ ।
पछिल्लो पटक mr_subhash_049 र sumit_049 नामक टिकटक आइडीबाट विवाह मण्डपमा चप्पल जुत्ता लगाएरै विभिन्न भोजपूरी तथा हिन्दी गीतहरूमा टिकटक बनाएर पोस्ट गरेको पाइएको छ ।
उनीहरूले धार्मिक तथा ऐतिहासिक महत्वका स्थलहरूको कुनै ख्याल नै नगरी अभद्र रूपमा टिकटक भिडियो बनाई सामाजिक सञ्जालमा पोस्ट गरेका छन् ।
स्थानीय प्रशासनले मन्दिर प्रांगणभित्र टिकटक भिडियो बनाउन नदिन भनेपनि प्रशासनले समेत भारा टार्ने हिसाबले मात्रै काम गरिरहेको स्थानीयको आरोप छ ।
‘प्रशासनले कडाइ गरेको भए मन्दिरभित्रै टिकटक भिडियोहरू सुटिङ नै हुँदैन थियो’,‘स्थानीय सुशील कर्णले भने, ‘मन्दिरमा मान्छे दर्शन गर्न पुग्छन् न कि टिकटक भिडियो बनाउन । प्रशासनले प्रतिवद्धता जनाउन बाहेक केही गर्न सकेको छैन, न कडा कारबाही नै अगाडि बढाएको छ ।’
स्थानीय युवा अनुज मिश्र भन्छन्, ‘पर्यटकीय स्थल तथा सर्वसाधारणको भीडभाड हुने ठाउँमा मनोरञ्जनको नाममा यस्ता खालका अश्लील क्रियाकलाप गम्भीर अपराध हो । यस्ता क्रियाकलाप गर्नेहरूलाई पक्राउ गरी उनीहरूको अभिभावकलाई बोलाएर यस्तो काम फेरि नगर्न प्रतिबद्धता गराउनु पर्दछ ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।