नेकपा माओवादी केन्द्रका नेता गिरिराजमणि पोखरेलले अमेरिकी सहयोग परियोजना (एमसिसी) यथास्थितिमा पास नहुनेमा आफूहरू लागेको बताएका छन्

बिहीबारको संसद बैठक स्थगित भएपछि सञ्चारकर्मीसँग कुरा गर्दै पोखरेलले भने, ‘पहिलो कुरा त हामी यथास्थितिमा एमसिसी पास हुन हुँदैन भन्नेमा लागेका छौं ।’

उनले आफूहरू अमेरिकाको विरोधी नभएको भन्दै विकास पनि चाहिएको टिप्पणी गरे । 

‘हामी अमेरिका विरोधी पनि होइनौं । हामीलाई विकास पनि चाहिएको छ । हामीलाई वास्तवमा साँच्चै अनुदान नै हो भने पनि चाहिएको छ । तर, अनुदानको नाममा, विकासको नाममा जे कुरा पृष्ठभागमा आएको छ । त्यो बुझिदिनुपर्‍याे’, उनले भने । 

उनले यदि एमसिसी अनुदान मात्रै हो भने किन नेताहरूलाई धम्की दिँदै हिँडेको भन्दै प्रश्न गरेका छन । 

यस सम्बन्धमा उनले भने, ‘यदि अनुदान नै हो भने किन पास गर्नुपर्‍याे भने धम्की दिँदै हिँडेको हाम्रा नेताहरूलाई ? लोभ, लालच धम्की सबै कुराहरू आइरहेका छन् । त्यसकारण राष्ट्रका लागि हामी खडा हुनुपर्छ । यथास्थितिमा यसलाई पास गर्न सकिँदैन । संसदलाई रबरस्ट्याम्प बनाउन खोजिँदैछ ।’

उनले अघि भने, ‘कुनै कुरा संशोधन गर्न नपाउने । पास गर्न त किन संशोधन ल्याउनपर्‍याे ? हाम्रो सार्वभौमिकतालाई चुनौती दिएको स्थिति छ । एकपटक हामी फेरि राष्ट्रका राजनीतिक पार्टीहरू सबै मिलेर यी कुराहरु करेक्सन गर्नुपर्छ भन्नुपर्छ । संसद एउटा राजनीतिक थलो हो । नयाँ ढंगले नयाँ ध्रुवीकरण पनि यसले सिर्जना गर्नसक्छ । एमसिसीमार्फत् नयाँ खालको परिस्थिति आएको छ ।’