चालु आर्थिक वर्ष २०७८/७९ को पहिलो सात महिनामा सरकारले पुँजीगत खर्च गर्न नसकेको पाइएको छ । 

नेपाल राष्ट्र बैंकले शुक्रबार जारी गरेको नयाँ तथ्याङ्कअनुसार गत साउनदेखि माघ महिनासम्ममा संघीय सरकारले कुल ५ खर्ब ९१ अर्ब २ करोड रुपैयाँ खर्च गरेको हाे ।

सरकारले खर्च गरेको रकममध्ये चालु खर्चतर्फ ४ खर्ब ७५ अर्ब ६२ करोड रुपैयाँ, पुँजीगत खर्चतर्फ ६० अर्ब ७९ करोड रुपैयाँ र वित्तीय व्यवस्था अन्तर्गतको खर्चतर्फ ५४ अर्ब ६१ करोड रुपैयाँ रहेको छ । 

बितेको सात महिनामा सरकारले कुल राजस्व ६ खर्ब १३ अर्ब ४१ करोड रुपैयाँ (प्रदेश सरकार तथा स्थानीय तहमा बाँडफाँड हुने रकमसमेत) परिचालन भएको छ । 

राजस्वमध्ये करतर्फ ५ खर्ब ६० अर्ब ८४ करोड र गैरकर राजस्वतर्फ ५२ अर्ब ५७ करोड परिचालन भएको छ । 

पछिल्लो सात महिनामा संघीय सरकारले ट्रेजरी बिलमार्फत् २३ अर्ब रुपैयाँ र विकास ऋणपत्रमार्फत् २९ अर्ब ५० करोड रुपैयाँ गरी कुल ५२ अर्ब ५० करोड आन्तरिक ऋण परिचालन गरेको छ ।