अभिनेता पल शाहविरुद्ध बलात्कारको आरोप लगाएकी पीडित नाबालिगले आफ्नो बयान फेरेकी छिन् । उनले अदालतमा आफ्नो बयान फेरेकी हुन् ।

जिल्ला अदालत तनहुँमा आइतबार बकपत्रका क्रममा उनले आफूमाथि बलात्कार नभएको बताएकी हुन् । 

यसअघि उनले आफूमाथि पलले बारम्बार बलात्कार गरेको र विवाह गर्ने आश्वासन दिएको बताएकी थिइन् । तर, आइतबार उनले अदालतमा बयान फेरेपछि हिरासतमा रहेका पल शाह छुट्ने सम्भावना बढेको छ ।

नाबालिकाको पक्षमा बहस गरेकी अधिवक्ता मोहना अन्सारीले यस विषयमा टिप्पणी गरेकी छिन् । उनले सामाजिक सन्जाल ट्विटरमा पुरुषार्थको विजय कसरी हुन्छ भन्ने विषयमा आफू साक्षी भएको टिप्पणी गरेकी हुन् । उनले ट्विटरमा लेखेकी छिन्– पुरुषार्थको विजय कसरी हुन्छ । आज साक्षी भइयो ।

यसअघि प्रहरीमा नाबालिग किशोरीले आफूलाई हुँदैन भन्दाभन्दै पलले बलात्कार गरेको आरोप लगाएकी थिइन् ।

पुरुषार्थ को विजय कसरी हुन्छ । आज साक्षी भैईयो 😡😡😡

— Mohna Ansari ‎ موھنا انصاري (@MohnaAnsari) April 17, 2022

उनका बाबुले ११ फागुनमा जिल्ला प्रहरी कार्यालय तनहुँमा जबरजस्ती किटानी जाहेरी दिएका थिए । अहिले पल पुर्पक्षका लागि जिल्ला कारागार तनहुँमा छन् । पीडित बालिकाको बयानकै आधारमा अदालतले पललाई थुनामा पठाएको थियो ।