तनहुँको व्यास नगरपालिकाको मेयरमा नेपाली कांग्रेसका उम्मेदवार वैकुण्ठनाथ न्यौपाने विजयी भएका छन् । उनी १२ हजार ७८ मत प्राप्त गरी मेयरमा विजयी भएका हुन् । 

न्यौपानेका निकटतम प्रतिद्वन्द्वी स्वतन्त्र–एमालेका उम्मेदवार दीपकराज जोशीले ११ हजार आठ सय २६ मत प्राप्त गरे । पराजित जोशी पूर्वमन्त्री गोविन्दराज जोशीका छोरासमेत हुन् । कांग्रेसलाई ‘आफ्नो क्षमता देखाउने’ रणनीतिका साथ छोरालाई मेयर उम्मेदवार बनाएका जोशी सफल हुन सकेनन् । 

उनी अघिल्लो निर्वाचनमा अन्तर्घात गरेको आरोपमा पार्टीबाट निष्काशनमा परेका थिए । गोविन्दका छोरा दीपकले कैँची चुनाव चिन्हका साथ प्रतिस्पर्धा गरेका थिए ।  

नगरपालिकाको उपप्रमुख पदमा कांग्रेसकी इन्दिरा दरै १३ हजार चार सय ९८ मतका साथ विजयी भइन् । उनका निकटतम प्रतिस्पर्धी नेकपा एमालेका वसुन्धरा घर्तीले १० हजार ४२ मत प्राप्त गरिन् ।