बाढीले राजमार्ग बगाएपछि गत कात्तिकभर यातायात सम्पर्क विच्छेद भएको बझाङमा फेरि त्यही नियति दोहोरिने संकेत देखिएको छ । बाढीले बगाएको जयपृथ्वी राजमार्गको छबिसपाथिभेरा गाउँपालिकामा पर्ने जालेबगर खण्ड पुनर्निर्माणमा ढिलासुस्ती हुँदा जिल्ला नै यातायात सम्पर्क विच्छेद हुने खतरा बढेको हो ।
कात्तिक अन्तिमतिर सेती नदीको धार फर्काएर अस्थायी रूपमा सडक सञ्चालन गरिएको थियो । यद्यपि हिउँ पग्लिने मौसम सुरु भएपछि सेतीको सतह बढेर अस्थायीरूपमा बनाइएको सडक नजिक पुगिसकेको छ । हिउँ पग्लिने क्रम बढेको र वर्षा पनि सुरु भइसकेकाले केही दिनभित्रै अस्थायी सडक बाढीले बगाउने सम्भावना बढेको प्राविधिकहरू बताउँछन् ।
‘वैशाखभित्रै स्थायी सडकको काम सम्पन्न गर्न सकिएन भने आउने असोजसम्मै बझाङ जिल्ला यातायातविहीन हुने निश्चित जस्तै भइसकेको छ,’ इन्जिनियर हरिशंकर जोशीले भने ।
यता सडक निर्माणको जिम्मा लिएका ड्रागन, जगदम्बा, सुर्मासरोवर जेभीका सञ्चालक शेरबहादुर बोहरा आफूले गर्ने सम्पूर्ण काम भइसकेको र जिल्ला प्रशासन कार्यालका कारण काम रोकिएको प्रतिक्रिया दिन्छन् । प्रशासनले लापरबाही गर्दा विस्फोटक पदार्थ उपलब्ध हुन नसकेकाले काम प्रभावित भएको उनले बताए ।
विस्फोटक पदार्थ उपलब्ध भएमा केही दिनमै काम सकिने बोहराले बताए । जिल्ला प्रशासन कार्यालयले भने ‘सडकको काम सडककै मान्छेलाई सोध्नू’ भन्दै जवाफ फर्काएको छ । जालेबगर सडकखण्डको बारेमा बुझ्न खोज्दा प्रमुख जिल्ला अधिकारी बाबुराम अर्यालले सडकको काम सडकको मान्छेलाई सोध्नुपर्ने र आफूलाई यस विषयमा कुनै जानकारी नभएको जवाफ दिए ।
जिल्ला प्रशासन कार्यालयले विस्फोटक पदार्थ उपलब्ध गरिदिनका लागि गृह मन्त्रालयमा पत्र पठाएको तर त्यसपछि आफूलाई केही जवाफ नआएको पनि प्रजिअ अर्यालले बताए ।
करिब १ सय मिटर पश्चिमतिरको कडा चट्टान फोरेर स्थायी सडक निर्माणको काम पुसमै सुरु भए पनि निर्माण कार्यमा ढिलासुस्ती हुँदा फेरि उस्तै समस्या दोहोरिने खतरा बढेको छ । ५ करोड ५० लाख रुपैयाँ लागतमा वैशाख मसान्तभित्रै सडकको पुनर्निर्माण सम्पन्न गर्ने गरी ड्रागन, जगदम्बा, सुर्मासरोवर जेभीसँग गत पुसमा ठेक्का सम्झौता भएको थियो ।
सडक खण्डको ८० मिटर भाग कडा चट्टानी रहेको र उक्त खण्डमा विस्फोटक पदार्थ प्रयोग गर्नुपर्ने भएको छ । रक्षा मन्त्रालयमार्फत उपलब्ध हुने विस्फोटक पदार्थ ल्याउन ढिलाइ हुँदा निर्माण कार्य नसकिएको भन्दै प्रजिअ र निर्माण व्यवसायीले एकअर्कालाई आरोप लगाउन थालेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।