मोरङ क्षेत्र नम्बर ३ बाट प्रतिनिधिसभा सदस्यका लागि चुनावी मैदानमा रहेकी राप्रपा नेत्री रेखा थापाले आफू आफ्नो साझा पहिचान थाती राखेर राजनीति मा होमिएको बताएकी छन् । पाएका मान्छेले झन् धेरै पाउने खेल राजनीति नभएको समेत उनले सामाजिक सञ्जालमा लेखेकी छन् । 

‘म अरू भित्र, आफू भित्र र समस्त ब्रह्माण्डमा धेरै सम्भावना छन् भन्ने ठान्दछु । कोही पहिचान बनाउन राजनीतिको सहारा लेलान् अर्कै कुरा- म आफ्नो साझा पहिचान थाती राखेर राजनीति मा होमिएको हुँ,’ अभिनेत्रीसमेत रहेकी थापाले लेखेकी छन्, ‘राप्रपामा बितेका सात वर्ष रहेर मैले एउटा कुरा स्थापित गर्न चाहेकी छु - राजनीतिको केन्द्रमा कमजोर, गरिब, पिछडिएको र अवसर नपाएका जनता हुनु पर्छ । पाएका मान्छेले झन् धेरै पाउने खेल राजनीति होइन । राजनीतिले ती नागरिकको सेवा गर्नु पर्छ जसको कोही छैन ।’