जुम्ला— जुम्लाको तिला गाउँपालिका–९ स्थित शेरा फूलबारी पाटनमा जडिबुटी संकलन गर्न गएका १२ जना चार दिनदेखि बेपत्ता भएका छन् । जडिबुटी संकलन गर्न बिहीबार गएका उनीहरु हिमपात भएपछि सम्पर्क विहीन बनेका हुन् ।

गाउँपालिका-९ का वडाध्यक्ष शेरबहादुर बोहोराले पाटनमा जडिबुटी संककलन गर्न गएका उनीहरुको अवस्थाबारे कुनै जानकारी नभएको बताए । सेतक चिनी, भुल्ते, धुपी र पदमचाल जडिबुटी संकलनका लागि उनीहरु बिहीबार पाटन गएका थिए । बेपत्ता हुनेमा तिला गाउँपालिका–९ ढिपु गाउँका धनबहादुर बोहोरा, छविराज बोहोरा, जंग रावत, सुमबहादुर बोहोरा, नरवीर बोहोरा, तुलु बोहोरा, ननिलाल रावत, सूर्य रावत, कल्पना बोहोरा, लाउरी बोहोरा, रेश्मा बोहोरा र मनमाया बोहोरा रहेका छन् । फूलबारी पाटनमा पुग्न गाँउदेखि झण्डै दुई दिन लाग्ने गरेको स्थानीय बताउँछन् ।

यस्तै सहायक प्रमुख जिल्ला अधिकारी देबेन्द्रप्रसाद श्रेष्ठले पाटनमा बेपत्ताकाे उद्धारका लागि गृहमन्त्रालयलाई हेलिकोप्टरको व्यवस्था गर्न आग्रह गरिएको बताए ।