धरानस्थित बिपी कोइराला स्वास्थ्य विज्ञान प्रतिष्ठानमा उपचार गराउन आएका एक बिरामी कोरोना भाइरसबाट संक्रमित भएको आशंकामा अस्पतालले परीक्षणका लागि राष्ट्रिय इपिडियोमोलोजी तथा रोग नियन्त्रण महाशाखा टेकु रेफर गरेको छ ।
उच्च ज्वरो र घाँटीको दुःखाइका कारण उनी उपचारका लागि प्रतिष्ठानको आकस्मिक कक्षमा भर्ना भएका थिए । उनलाई बिहीबार साँझ नै काठमाडौं रेफर गरिएको आकस्मिक विभागका प्रमुख ज्ञानेन्द्रबहादुर मल्लले जानकारी दिए । उनी तीन दिनअघि उच्च ज्वरो, घाटी दुख्ने समस्या भएपछि बिहीबार बिहान अस्पताल भर्ना भएको डा. मल्लले जानकारी दिए । ‘पुष्टि भएको होइन । शंका लागेर मात्र पठाइएको हो,’ डा. मल्लले भने । उनलाई तीन दिनदेखि १०३ डिग्रीसम्म ज्वरो आएको थियो ।
धरान–११ घर भएका उनी पाँच दिनअघि मात्र दक्षिण कोरियाबाट नेपाल आएको बताइएको छ । मेडिसिन विभाग र प्रतिष्ठानको विज्ञ टोलीसँगको परामर्शपछि उनलाई परीक्षणका लागि टेकु पठाइएको छ । प्रतिष्ठानमा कोरोना भाइरस संक्रमण भएको हो कि होइन भन्ने जाँच गर्ने किट उपलब्ध छैन ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।