काठमाडौं– नेपाली कांग्रेसले चैत्र मसान्तसम्मका लागि क्रियाशील सदस्यता वितरण र नवीकरणको कामलाई स्थगन गरेको छ । कांग्रेका प्रवक्ता विश्वप्रकाश शर्माले शनिबार एक प्रेस विज्ञप्ति जारी गर्दै यसबारे जानकारी गराएका हुन् ।
एवं सूचना, सञ्चार एवं प्रचार विभाग प्रमुख समेत रहेका शर्माले नेपाली कांग्रेसले चैत्र मसान्तसम्मलाई क्रियाशील वितरण र नवीकरण स्थगन गर्दै सचेतना अभियानमा सक्रिय हुने जानकारी गराएका छन् ।
शर्माका अनुसार प्राणघातक कोरोना भाइरसको जोखिम दृस्टिगत गरेर ठूला भेला र सम्मेलन यसअघि नै स्थगित गरिएको भएपनि चौधौँ महाधिवेशन तयारीसँग सम्बन्धित (क्रियाशील सदस्यता नवीकरण र वितरण एवं बांकी समायोजन) कार्य जारी राखिएको थियो । तर, पछिल्लो समयमा अझ बढेको जोखिमबाट थप सतर्कताका लागि चैत्र ९ देखि लागू हुनेगरी ती कार्य ०७६ चैत्र मसान्तसम्मका लागि स्थगित गरिएको छ ।
त्यसैगरी सहरदेखि गाउँसम्म, गाउँको टोल हुँदै घरघरसम्म कोरोना सचेतना अभियानमा पार्टीपक्तिको क्रियाशीलता भने सतर्कतापूर्वक विविध ढंगले जारी रहने उल्लेख गर्दै उनले यसका लागि जिल्ला, क्षेत्र, गाउँ–नगरका कांग्रेस कार्यत्रर्तालाई विभिन्न दल, समुदाय र स्वास्थकर्मीसँग आवश्यक समन्वय गरी स्वयंसेवीको भूमिका निभाउन आग्रह गरेका छन् ।
कांग्रेसले सचेतना अभियानमा सञ्चारका विविध माध्यमको प्रयोगमा तीव्रता दिने र आवश्यकताअनुसार केन्द्रीय कार्यालय खुला राख्ने भएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।