सुदूरपश्चिम प्रदेश सरकारले पहिलो चौमासिकमा ६ दशमलव २९ प्रतिशत अर्थात् २ अर्ब ९ करोड ८६ लाख ३६ हजार रुपैयाँ खर्च गरेको छ ।

कात्तिक मसान्तसम्म चालुतर्फ एक अर्ब १० करोड ४७ लाख र पुँजीगततर्फ ९९ करोड २८ लाख रुपैयाँ गरी दुई अर्ब नौ करोड ८६ लाख रुपैयाँ खर्च भएको आर्थिक मामिला तथा योजना मन्त्रालयले जानकारी दिएको छ । 

चालु आर्थिक वर्षमा प्रदेश सरकारले बजेट खर्च प्रगति ९० प्रतिशत पु¥याउने लक्ष्य रहेको आर्थिक मामिला तथ योजना मन्त्री झपट बोहराले बताए । चालु वर्षमा सुदूरपश्चिम प्रदेशले ३३ अर्ब २८ करोड रुपैयाँ बजेट बिनियोजन गरेको छ ।

चालु आर्थिक वर्षको प्रथम चौमासिक बजेट खर्च र राजस्व संकलनको अवस्था सार्वजनिक गर्दै मन्त्री बोहोराले गत वर्षको तुलनामा १ दशमलव ७६ प्रतिशतले खर्च वृद्धि भएको बताए ।

यस्तै, प्रदेशले पहिलो चौमासिकमा गत वर्ष भन्दा ६४.४५ प्रतिशत बढी राजश्व संकलन गरेको छ । चालु आर्थिक वर्षमा ७६ करोड ७० लाख ३० हजार राजस्व संकलन गर्ने लक्ष्य रहेकोमा पहिलो चौमासिकमा लक्ष्यको ४५.९३ प्रतिशत अर्थात् ३१ करोड ९ लाख ६६ हजार राजस्व संकलन गरेको हो ।