कोरोनाभाइरसको दोस्रो लहरको प्रभावका कारण स्थानीय प्रशासनले धनुषासँग जोडिएका भारतीय नाका आज बुधबारदेखि पूर्णरुपमा बन्द गरेको छ ।
 
धनुषाका प्रमुख जिल्ला अधिकारी बन्धुप्रसाद बास्तोलाले एक सूचना जारी गर्दै कोरोनाको लहर तीव्र रुपमा बढिरहेकाले धनुषासँग जोडिएको सबै नाका बन्द गरिएको जानकारी दिए । 

प्रजिअ बास्तोलाले नेपाल सरकार मन्त्रिपरिषद्को आइतबारको निर्णयमा नेपाल भारतबीच आवतजावत गर्न यस जिल्लाको कुनै नाका नपरेकाले जिल्लाका नाकाबाट भारततर्फ आवतजावत गर्न निषेध गरिएको जानकारी दिएका छन् । 

धनुषासँग जोडएको जटही, इनर्वालगायत नाकाबाट आवतजावत गर्न पूर्ण रुपमा रोक लगाइएको छ ।