दार्चुला सदरमुकाम खलंगासँग दुहुँ गाउँपालिका र व्याँस गाउँपालिकाको सम्बन्ध विच्छेद भएपछि नाजिङगाडमा नेपाली सेनाले अस्थायी काठेपुल बनाएको छ ।
 
आइतबार राति आएको बाढीले मोटरेबल पुल बगाउँदा स्थानीयलाई आवतजावतमा कठिनाइ भएपछि सेनाले अस्थायी काठे पुल बनाएको हो ।

नेपाली सेनाको गुरुगोरख दल गुल्म र स्थानीयको सहयोगमा मंगलबार अस्थायी काठेपुल निर्माण गरेको जनाइएको छ । पुल बनेपछि आवतजावतमा सहज भएको छ ।
  
आइतबार राति आएको बाढीले जिल्लामा रहेको अपि पावर कम्पनीले निर्माण गरिरहेको माथिल्लो चमेलियाको ड्याम साइडमा चमेलिया नदीले क्षति पुगाएको छ । निर्माणाधीन ४० मेगावट क्षमताको जलविद्युतको ड्याम क्षेत्रमा बाढीले क्षति पुर्याएको जिल्ला प्रहरी कार्यालय दार्चुलाले जनाएको छ ।  

अपि गाउँपालिकाको ओखलनजिकै निर्माण भइरहेको ड्याम क्षेत्रमा पूरै बालुवा र माटो भरिएको छ । यस्तै, निर्माणस्थलमा रहेका स्काभेटर, टयाक्टर, र निर्माण सामग्रीमा क्षति पुगेको जिल्ला प्रहरी कार्यालय दार्चुलाका डिएसपी मनोहरप्रसाद भट्टले जानकारी दिए ।