१२ कक्षाको परीक्षा दिएर बसेका विद्यार्थीहरूलाई लक्षित गर्दै काठमाडौंको सफ्टवेरिका कलेज अफ आइटी एण्ड इकमर्सले कोभेन्ट्री विश्वविद्यालयको सहकार्यमा सन्चालन गरेको ‘नेपाल आइओटी च्यालेन्ज’ सम्पन्न भएकाे छ ।
कार्यक्रममा आइओटीसँग सम्बन्धित विद्यार्थीले बनाएका विभिन्न परियोजनाको प्रदर्शन गरिएकाे थियाे।
अवलोकनकर्ताको भोटिङको आधारमा ‘लुसी’ टिम प्रथम भएको छ । उक्त टिमले खोलामा आउने बाढीको पूर्व सूचना दिने ‘फ्लाेड प्रेडिक्सन सिस्टम’ निर्माण गरेको थियो ।
भोटकै आधारमा टिम ‘दि डक्टर्स फोर्टिसिक्स’ दोस्राे भएको छ । उक्त टिमले बाइक दुर्घटनाको सूचना सम्बन्धित व्यक्तिलाई पुर्याउने ‘एक्सिडेन्ट अलर्ट भेहिकल’ बनाएका थिए।
त्यस्तै टिम ‘म्याट्रिक्स’ तेस्रो भएको छ । औषधि पसलको सम्भावना नभएका ठाउँमा पनि सजिलै राख्ने सकिने र आपत पर्दा आवश्यक औषधि निकाल्न सकिने ‘इमर्जेन्सी मेडिकल भेन्डिङ मेसिन’ ले म्याट्रिक्स टिमलाई पुरस्कार दिलाएको हो ।
विजेताले क्रमशः पचास हजार, तीस हजार र बीस हजार रुपैयाँ तथा प्रमाणपत्र प्राप्त गरेको कलेज प्रमुख प्रमोद पौडेलले बताए ।
प्रदर्शनीमा विद्यार्थीहरूले बनाएका ड्रोन, विद्युतीय सवारी, अटोनोमस सवारी, ट्राफिक म्यानेजमेन्ट सिस्टम, फ्लड डिटेक्सन, स्मार्ट सेक्युरिटी, फायर कन्ट्रोल रोबोट लगायतका परियोजना राखिएको थियो ।
नि:शुल्क प्रवेश रहेको प्रदर्शनी सफ्टवेरिका कलेजको प्रांगण डिल्लीबजारमा आयोजना गरिएको थियो ।
कार्यक्रममा विद्यार्थीहरू पाँच जनाको समूह बनाएर सहभागी भएका थिए । दर्ता भएका समूहहरूलाई कलेजले गरेको १० दिने निशुल्क बुटक्याम्पमा आइओटी प्रशिक्षण दिएको थियो ।
प्रशिक्षण सकिएपछि विद्यार्थी समूहले बनाएको आइओटी प्रोजेक्टको प्रदर्शनी आयोजना गरिएको थियो । यसरी प्रदर्शनीमा राखिएका प्रोजेक्टहरूमध्ये अवलोकनकर्ताको भोटको आधारमा तीन उत्कृष्टलाई नगद पुरस्कार दिइएको पौडेलले बताए ।
तीन हजार जनाले प्रदर्शनी अवलोकन गरेको जनाइएकाे छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।