काठमाडौं– वाणिज्य बैंकहरुबीच ब्याजदरमा अस्वस्थ प्रतिस्पर्धा बढेको भन्दै नेपाल राष्ट्र बैंकले बैंकहरुलाई चेतावनी दिँदै ब्याजदरमा अंकुश लगाएको छ । राष्ट्र बैंकले सबै वाणिज्य बैंकका सिइओहरुलाई बोलाएर मुद्दती तथा बचत खाताहरुका लागि ब्याजदरमा सीमा तोकिदिएको हो । 

राष्ट्र बैंकले तोकेको सीमाअनुसार अब बैंकहरुले बचतमा साढे ६ प्रतिशतमात्र ब्याज दिने छन् । व्यक्तिगत मुद्दती खाताका लागि भने ब्याजदर ९.२५ प्रतिशत नकटाउन र संस्थागत मुद्दतीका लागि ८ प्रतिशत मात्र ब्याजदर निर्धारण गर्न राष्ट्र बैंकले निर्देशन दिएको छ ।

राष्ट्र बैंकको यो निर्देशनपछि बैंकका सिइओहरुले ब्याजदर घटाउनेमा सहमति जनाएका छन् । यसअघि उनीहरुले निक्षेपमा ११ प्रतिशतसम्म ब्याजदर कायम गर्ने सहमति गरेका थिए । 

तर, केही समययता तरलता अभावको कारण देखाउँदै केही बैंकहरुले साढे १३ प्रतिशतसम्म ब्याज दिने भन्दै आक्रामक प्रचार गरिरहेका थिए । राष्ट्र बैंकले ब्याजदरको सीमा तोकिदिएपछि बैंकर्सहरुले तरलता समस्या झन् लम्बिने बताएका छन् । 

बैंकहरुले आक्रामक प्रचार गर्दै प्रतिस्पर्धात्मक रुपमा १३ प्रतिशतभन्दा धेरै ब्याजदर घोषणा गर्न थालेपछि अर्थमन्त्री डा. युवराज खतिवडाले राष्ट्र बैंकका डेपुटी गर्भनर शिवराज श्रेष्ठको संयोजकत्वमा एक अध्ययन समिति बनाएका थिए ।