साउदी अरबका राजा सलमान स्वास्थ्य परीक्षणका लागि अस्पताल भर्ना भएका छन् । राजा सलमानलाई अस्पताल भर्ना गरिएको साउदीका सरकारी सञ्चारमाध्यमले उल्लेख गरेका छन् ।

राजा सलमानको स्वास्थ्यको बारेमा धेरै अड्कलबाजी गरिएको छ, तर आधिकारिक रूपमा ती अनुमानहरूबारे कुनै बयान जारी गरिएको छैन ।

सन् २०१५ मा राजा सलमानको राज्याभिषेक भएको थियो । साउदी अरबका राजा सलमान विश्वको सबैभन्दा ठूलो तेल निर्यात गर्ने देशका शासक हुन् । उनलाई शनिबार जेद्दास्थित किंग फैसल स्पेशलिस्ट अस्पतालमा भर्ना गरिएको थियो ।

यस सम्बन्धमा जारी गरिएको एक आधिकारिक विज्ञप्तिमा उनलाई केही स्वास्थ्य परीक्षण गर्न अस्पताल भर्ना गरिएको उल्लेख छ ।

यद्यपि, यो जानकारी सार्वजनिक हुनु आफैँमा एकदमै अनौठो मानिएको छ, किनभने सामान्यतया शाही घरानासँग सम्बन्धित कुनै पनि व्यक्तिगत जानकारी सार्वजनिक हुँदैन ।